Həzrəti Fatimə (sa) niyə gecə dəfn edildi?

Həzrəti Fatimə salamullahi aleyha, öz evində hücuma məruz qaldı və övladı Muhsin siqt oldu. Bu səbəbdən xəstələndi, 75 və ya 95 gün sonra şəhadətə çatdı. Əli əleyhissalam Əbu Bəkr və Ömərə xəbər vermədən onu gizlincə dəfn etdi. Bu məsələ əhli-xilaf mənbələrində xüsusilə vurğulanıb və sübut edir ki, Həzrəti Fatimə salamullahi aleyha onlara qəzəbli halda dünyadan gedib.

"Fatimə Əbu Bəkrə acıqlandı və çıxıb getdi, ömrünün sonunadək də onu danışdırmadı. Fatimə Peyğəmbərdən (sallallahu aleyhi və alih) sonra altı ay yaşadı və vəfat edəndə Əli (əleyhissalam) Əbu Bəkrə xəbər vermədən gecə ikən cənazə namazı qıldı və dəfn etdi. Əlinin Fatimə həyatda ikən insanlar arasında etibarı (hörməti) var idi. Ancaq Fatimə (salamullahi aleyha) vəfat etdikdən sonra insanların Əliyə münasibəti dəyişdi..."

"Səhih", Buxari, Kitabul-Məğazi, Xeybər ğəzvəsi babı

"Səhih", Muslim, Kitabul-cihad vəssiyər

"Səhih", İbni Hibban, cild 11, səh. 152

"Əli Fatiməni gecə dəfn etdi ki, Əbu Bəkr ona namaz qılmasın, çünki onların arasında müəyyən hadisələr baş vermişdi."

"Həsən ibni Muhəmməddən də bunun bənzəri rəvayət gəlmişdir, bir fərqlə ki, orada "Fatimə özü belə vəsiyyət etmişdi" deyilirdi."

"Əl-Musənnəf", Əbdurrəzzaq Sənani (Əhməd ibni Hənbəlin hədis müəllimi olub), cild 3, səh. 521

"Əli ibni Əbu Talib, Fatiməni gecə dəfn etdi ki, Əbu Bəkr onun cənazəsinə namaz qıla bilməsin, çünki onların arasında müşküllər var idi."

"Şərh Səhih Buxari", İbn Bəttal Maliki, cild 3, səh. 320

"Fatimənin qəbri keçmişdəki və indiki hakimlərin düşmənçiliyinə görə məxfi qalmışdır."

"Əl Vəfaul-Vəfa" , Əli ibni Əhməd Səmhudi, cild 3, səh. 906

"Fatimə atasının vəfatından sonra "zuub" olmuşdu (ərəb dilində bir şeyin su kimi olmağına, "əriməyinə" deyirlər)"

"Atasından üç ay sonra öldü"

"Əli ona qüsl verdi"

"Fatimə gecə dəfn edildi."

"Siyər ələmu nubəla", Şəmsuddin Zəhəbi, cild 2, səh. 128

(Görəsən nə baş vermişdi ki, Həzrəti Fatimə gənc yaşında bu vəziyyətə düşmüşdü?)

"Aişədən gələn səhih hədisə görə, Əli Fatiməni gecə dəfn elədi, Əbu Bəkrə xəbər vermədi, bundan sabit olur ki, Əbu Bəkr onun ölümünü bilmirdi."

"Ət-Təlxis", İbni Həcər Əsqəlani, cild 2, səh. 327

"Fatimə Əbu Bəkrdən atasının mirasını istədi, Əbu Bəkr qəbul etmədi, and içdi ki, daha onunla danışmayacaq və vəsiyyət etdi ki, gecə dəfn olunsun ki, Əbu Bəkr dəfnində iştirak etməsin."

"Təvil muxtələf əl-hədis", İbni Quteybə Deynəvəri, cild 1, səh. 300

(Qeyd: Burada bir şübhəyə cavab vermək də yerinə düşərdi. Əhli-xilaf bəhanə gətirir ki, guya bu vəsiyyət ona görə idi ki, Həzrəti Fatimə salamullahi aleyha istəmirdi naməhrəmlər onun cənazəsini görsün. Bu bəhanəni uyduranların deyəsən xəbəri yoxdur ki, cənazə zatən kəfəndə olur, sonra da tabuta qoyulur. Bunun cənazə namazının qılınmağına nə dəxli? Hətta bəzi mənbələrə əsasən, dəfndə Salman, Əbu Zər və s. şəxslər iştirak ediblər, məgər onlar naməhrəm deyildi? Digər tərəfdən, Aişə və Həfsə öləndə bütün camaat onların dəfnində iştirak edib, onlar naməhrəm sayılmır?)

Bu mənbələrdən aydın olur ki, Həzrəti Fatimə salamullahi aleyha o qədər qəzəbli idi ki, üstündən bir neçə ay keçməsinə baxmayaraq, vəsiyyət edir ki, cənazəsinə belə gəlməsin. Bəs Həzrəti Fatimə salamullahi aleyhanı qəzəbləndirənin hökmü nədir?

"Rəsulullah (s.a.a.) buyurdu: Fatimə mənim bir parçamdır, kim onu qəzəbləndirsə, məni qəzəbləndirib."

"Səhih", Buxari, Kitab Fəzailus-səhabə, Fatimə əleyhassalamın fəzilətləri babı.

Rəsulullah (s.a.a) Fatiməyə (s.a) buyurdu: Allah sənin qəzəbinlə qəzəblənir, sənin razılığınla razı qalır.

"Mucəmul-Kəbir", Təbərani, musnədun-nisa, Fatimə bintu Rəsulillah, hədis 1001.

"Mustədrək əs-səhiheyn", Hakim Nişapuri, cild 3, səh. 167

Şübhəsiz, Allah və Rəsulunu incidənləri Allah həm bu dünyada, həm də axirətdə lənətləmiş və onlara alçaldıcı əzab hazırlamışdır.

Əhzab surəsi, 57-ci ayə

Qeyd: Nəyə görə Həzrəti Fatimə salamullahi aleyhanın razılığı və qəzəbi, Allahın razılığı və qəzəbidir? Ola bilərmi ki, desinlər adi insandı, nahaq yerə qəzəblənə də bilər? Eyni şey Əli əleyhissalam barədə də keçərlidir.

Əli əleyhissalam: “Toxumu yaran və insanı yaradan Allaha and olsun ki, Ümmi Peyğəmbərin (s.a.a) mənə əhdi-peymanı budur; Məni (Əlini) sevən yalnız mömin, mənə nifrət edən isə yalnız münafiq olan kəs olar.”

"Səhih", Muslim, Kitabul-İman, 18-ci fəsil

Burada isə iman və münafiqliyin meyarı Əli əleyhissalama olan münasibətdir. Adi adama görə Allah belə bölgü edərmi?

Xeyr. Çünki Allah bilir ki, onlar Allahın iradəsinə bağlıdırlar və məsumdurlar, günahdan və çirkinliklərdən pakdırlar.

Ey Əhli-beyt! Həqiqətən, Allah sizdən pisliyi uzaqlaşdırmaq və sizi tərtəmiz etmək istəyir.

Əhzab surəsi, 33-cü ayə