5 yaşlı İmam?

İmam Məhdi(əf) barədə ən çox verilən suallardan bidi budur ki, necə olur beş yaşlı bir uşaq imamət məqamına çatır. Bu şübhəni icad edənlərin ya İslami mənbələrdən xəbəri yoxdur, ya da qərəzli şəkildə bunu edir. Çünki həm Quran, həm də hədislərdə buna aid çox nümunə vardır.

İmamət və eləcə də nübuvvət, zahiri bir məsələ deyildir. Önəmli olan Allahın həmin şəxsi seçməsi və bu məqama təyin etməsidir. Necə ki, Qurani Kərimdə Həzrəti İsa əleyhissalam barədə buyurur:

(Məryəm) ona işarə etdi. Onlar dedilər: “Beşikdə olan körpə ilə necə danışaq?” (Körpə) dedi: “Həqiqətən də, mən Allahın quluyam! O mənə Kitab verdi və məni peyğəmbər etdi.

Məryəm surəsi, 29-30-cu ayələr

Eyni zamanda Yəhya əleyhissalam barədə buyurur:

“Ey Yəhya! Kitabdan möhkəm yapış!”(–) (deyə vəhy etdik.) Biz uşaq ikən ona hökm bəxş etik.

Məryəm surəsi, 12-ci ayə

Əli əleyhissalam məgər uşaq yaşında iman gətirmədimi? Bütün müsəlmanlar ittifaq edib ki, İslamı ilk qəbul edən şəxs Əli əleyhissalam olmuşdur və imanı da qəbuldur. Ancaq bununla bitmir. Rəsulullah (sallallahu aleyhi və alih) Yəvmuddar günü onu özünün qardaşı, vəsisi və xəlifəsi bilir:

Sizdən hansı biriniz bu işdə mənə kömək etməklə qardaşım, vəsim və sizin aranızda xəlifəm olmaq istəyir?” Oradakılar susdular. Mən aralarında yaşca ən kiçik, gözünün ağı qarasından daha çox, qarnı böyük və ayaqları ən incə olmağıma baxmayaraq dedim: “Ey Allahın Peyğəmbəri, bu işdə sənin köməkçin mən olaram.” Əlini boynumun arxasına qoydu və buyurdu: “Həqiqətən bu mənim qardaşım, vəsim və məndən sonra sizin aranızdakı xəlifəmdir. Onun sözlərini eşidib itaət edin. Orada toplananlar ayağa qalxdılar və gülərək Əbu Talibə dedilər: “Sənə oğlunu dinləyib, ona itaət etməyi əmr etdi.”

"Tarix əl-uməm vəl-mulk", Muhəmməd ibni Cərir Təbəri, cild 1, səh. 542-543

İmam Muhəmməd Cavad əleyhissalam 9 yaşında (bəzi mənbələrə görə hətta 7) imamətə çatmışdı.Məmun onun uşaq olmasından istifadə edib alimlərə deyirdi ki ona sual versinlər., bəlkə bu yolla camaatda şübhə yarada. Ancaq o öz elmi ilə həmin alimləri susdurmağı bacarmışdı.  Hətta şiə olmayanlar belə onun ən elmli olmağını etiraf edirdilər. Bunlara misal olaraq əhli-xilaf alimi Heytəmini misal göstərmək olar:

"Məmun onu özünə kürəkən seçdi, çünki yaşının az olmağına baxmayaraq, elm, helm və agahlıqda bütün alimlərdən daha fəzilətli idi."

"Səvaiqul-muhriqə", İbni Həcər Heytəmi, səh. 205

(Bir məsələni də xatırlatmaq yerinə düşərdi. Əhli-xilaf alimləri bu etirafları etsələr də, heç düşünüblərmi ki, onlar bu elmləri haradan əldə edirdilər? Əgər birbaşa ata-babalarından irs olaraq almışdılarsa, ən pak silsilə ilə birbaşa Rəsulullaha (sallallahu aleyhi və alih) bağlanırdılar və sünnəni də onlardan yaxşı bilən olmaz. Həmçinin, onların məzhəbi nə idi? Niyə bəs camaat onların yoluna tabe olmurdular?)

İmam Əliyyən Nəqi əleyhissalam da 6 yaşında imamətə çatmışdı. O da atası kimi elmi bəhslərdə iştirak edib hamıdan üstün olmağını sübut etmişdi.

İmam Məhdi əleyhissalamın uşaq yaşında imam olacağı barədə isə əvvəlki İmamlar (ə) öncədən xəbər vermişdilər:

İmam Baqir (əleyhissalam): "Bu işin sahibi bizim yaşca ən balacamız və ən gizlinimizdir."

"Biharul-ənvar", Əllamə Məclisi, cild 51, səh. 38

Bu işin bir neçə hikməti ola bilər ki, doğrusunu Allah bilir. İmamları (ə) çox gənc yaşda öldürürdülər və buna görə də növbəti imam dərhal təyin olunmalı idi ki, yer üzü imamsız qalmasın. Həmçinin, Allah bununla öz qüdrətini nümayiş etdirirdi və uşaq yaşlı İmamın (ə) göstətdiyi elmi və əxlaqi dəyərlər, kəramətlər insanlara daha çox təsir qoyurdu. Aydın olurdu ki, bütün bunları qısa müddətə, özü də uşaq vaxtı öyrənmək mümkün deyil və ilahi fəzilətlərdir. Peyğəmbərlikdə də olduğu kimi, imamətdə də Allah daha yaxşı bilir ki, kimi seçsə daha yaxşıdır.

Allah daha yaxşı bilir öz risalətini harada qərar versin.

Ənam surəsi, 124-cü ayə